Кошаркарите на ТФТ направија голем подвиг и обезбедија пласман во полуфиналето на плеј-офот во АБА 2 лигата, откако на гостински терен во Чајетина го совладаа Златибор со 90:80 и со вкупни 2-1 ја добија четвртфиналната серија.
Македонскиот тим одигра одличен натпревар и уште од самиот старт најави изненадување. Во првата четвртина ТФТ беше доминантен и со ефикасна игра брзо се одвои на двоцифрена разлика (26:12). На почетокот на втората четвртина, по поените на Ташовски, гостите имаа и максимални +15 (30:15).
Сепак, Златибор возврати и до крајот на првото полувреме ја намали негативата, па на пауза ТФТ имаше минимална предност од 38:36.
Во продолжението се водеше израмнета борба. Домашните дури и поведоа со 43:39, но избраниците на Боро Смилковски не дозволија резултатски пад. Со цврста игра и добра ротација, ТФТ остана во игра и во завршницата влезе со активен резултат (59:57 за Златибор по третата четвртина).
Одлучувачките моменти дојдоа во последниот период, кога ТФТ повторно го крена нивото на игра и направи клучна серија за водство од 73:67. Златибор се доближи на само еден посед (80:77), но во финишот Говенс, Стојаноски и Зафиров ја запечатија победата и донесоа недостижна предност за конечни 90:80.
Најефикасен кај ТФТ беше Говенс со 23 поени, на кои додаде осум асистенции и седум скока. Одлична поддршка имаше од Зафиров (14 поени, шест скока), Ташовски (13) и Дејвис (12). Посебно се истакна и младиот Стојанов, кој одигра фантастичен меч со максимален учинок од игра (2/2 за три, 3/3 за два), плус слободно фрлање, три асистенции и еден скок.
Во полуфиналето, ТФТ ќе се соочи со екипата на Сутјеска од Никшиќ. Серијата се игра на две добиени, со првиот натпревар закажан за 8 април во Никшиќ, реваншот на 15 април, а евентуалната мајсторка на 22 април – повторно на теренот на црногорскиот тим.
