ОФИЦИЈАЛНО: Доминик Мате е ново големо засилување на ГРК Охрид!

ГРК Охрид продолжува со сериозно засилување на ростерот за наредната сезона, откако официјално го претстави унгарскиот репрезентативец Доминик Мате како второ ново име во тимот.

Станува збор за ракометар кој важи за едно од најзвучните засилувања во поновата историја на клубот. Мате денес го прославува својот 27-ми роденден, игра на позицијата десен бек, висок е 202 сантиметри и тежок 108 килограми, а во Охрид ќе го носи дресот со број 23.

Унгарецот пристигнува од норвешкиот шампион Елверум, клуб кој бележи значајни резултати и на европската сцена. Во својата кариера настапувал и за европските гиганти ПСЖ и Киелце, како и за унгарскиот Балатон, што доволно говори за неговиот квалитет и искуство.

Мате е стандарден член и еден од носителите на играта во унгарската репрезентација, со настапи на најголемите светски и европски натпреварувања.

Со неговото доаѓање, Охрид испраќа јасна порака дека амбициите за следната сезона се високи, како на домашната сцена, така и во европските натпреварувања.

“Мило ми е што ќе го облечам дресот на ГРК Охрид. Од првиот разговор бев импресиониран од проектот и плановите за идниот период. Едвај чекам да ги запознаам фановите, се надевам дека ќе играм клучна улога во остварувањето на нашите цели, освојување на титула во лигата и што поголеми успеси во интернационалните натпреварувања.” – изјави Мате.