Македонскиот интернационален делител на правдата Јосип Христов ќе биде дел од судискиот колегиум на полуфиналниот реванш дуел меѓу АЦХ Волеј и Пјаченца во ЦЕВ купот во машка конкуренција, кој на 2 април ќе се игра во спортскиот центар „Тиволи“ во Љубљана.
Христов е делегиран како втор судија заедно со белгискиот колега Бјорн Вилемс, а арбитрите нема да имаат нималку лесна задача со оглед на тоа дека првиот натпревар меѓу овие две екипи кој се играше во Италија заврши со 3:2 за Пјаченца.
Македонскиот судија судеше единствено во ЦЕВ купот во машка и женска конкуренција, а полуфиналето е петто делегирање за него сезонава.
