ЖКК Струга 2009 поведе во финалето: драматична победа над ЖКК Гевгелија за чекор поблиску до Првата лига

Кошаркарките на ЖКК Струга 2009 направија значаен исчекор кон пласман во „Шпаркасе Лајф“ Првата лига, откако славеа во првиот натпревар од финалната плеј-оф серија против ЖКК Гевгелија со тесни 72:70 и поведоа со 1-0 во серијата.

Стружанки пред домашната публика имаа одличен старт и по првата четвртина создадоа двоцифрена предност (26:14), најавувајќи сигурен тек на натпреварот. Сепак, гостинките од Гевгелија возвратија во вториот период, направија целосен пресврт и на паузата заминаа со водство од 39:35.

Гевгеличанки продолжија со добрата игра и во третата четвртина, кога ја зголемија предноста на 56:48, но во последниот период следуваше пад во нивната игра. Домашниот состав тоа знаеше да го искористи, направи резултатски пресврт и во неизвесна завршница стигна до минимална, но исклучително важна победа.

Најефикасна во редовите на Струга 2009 беше Муртезаи со 29 поени, додека Хиса додаде 16, а Зиба 13 поени. Кај Гевгелија, Муса-Димитровски и Стојковска постигнаа по 18 поени, додека Стојановска реализираше 17.

Серијата сега се сели во Гевгелија, каде вториот натпревар ќе се одигра утре од 17 часот во спортската сала „26 Април“. Во елитното друштво ќе се пласира екипата која прва ќе стигне до две победи во финалната серија.