Министерот за спорт, Борко Ристовски, денеска ги пречека младите македонски репрезентативци Омер Елези, Дин Ризвановиќ и Изабела Зајков, која освои бронзен медал на Светското првенство во самбо за кадети, што се одржа во Солун, Грција. На средбата во Министерството за спорт присуствуваа и претседателот на Македонската самбо федерација, Ердал Факиќ и генералниот секретар, Славчо Тодоров.
Во разговорот беа истакнати постигнатите резултати на младите самбо-спортисти на Светското првенство за кадети, нивната посветеност и потенцијалот за остварување нови успеси на меѓународната спортска сцена.
Министерот Ристовски ѝ честиташе на Изабела Зајков за освоениот бронзен медал, како и на Омер Елези и Дин Ризвановиќ за нивните настапи и заложби за афирмација на македонскиот спорт.
„Овие успеси се најдобра потврда дека Македонија располага со талентирани генерации кои имаат квалитет и потенцијал за врвни резултати. Нашата обврска е да ги поддржуваме младите спортисти, да им овозможиме услови за напредок и да ги охрабруваме да продолжат да се натпреваруваат и успешно да ја претставуваат Македонија на меѓународната сцена“ – истакна Ристовски.
Министерството за спорт останува посветено на поддршката на младите спортски таленти и создавањето услови за нивен развој и напредок. Со освоениот бронзен медал на СП за кадети, Изабела Зајков ги исполнува условите да биде стипендист на Министерството за спорт од категоријата „Спортска надеж“.
