Фудбалскиот клуб Палатица од Тетово, кој настапува во општинската лига, на достоинствен и симболичен начин му оддаде признание на спортскиот новинар Буран Муслиу од каналот „Спорти Сот“, наградувајќи ја неговата континуирана поддршка и присутност на натпреварите на тимот.
Во знак на благодарност, раководството на клубот му подари дрес со името на каналот „Спорти Сот“ и бројот 23 – број кој има лично значење за новинарот. Овој гест претставува признание за неговата посветеност во следењето и промоцијата на активностите на клубот, но и на локалниот фудбал воопшто.
Од клубот истакнаа дека медиумската поддршка е од суштинско значење за развојот и видливоста на помалите средини, нагласувајќи дека ангажманот на нашиот колега Муслиу значително придонел Палатица да добие поголемо внимание и афирмација.
Овој потег уште еднаш ја потенцира важноста на соработката помеѓу спортските колективи и медиумите, како клучен фактор во унапредувањето и популаризацијата на локалниот спорт.
Инаку, Буран Муслиу е соработник и на редакцијата на Спортска Мрежа.
