Младата репрезентација на Македонија до 19 години оваа недела ја започнува својата авантура во првата рунда од квалификациите за пласман на Европското првенство. Избраниците на селекторот Димитар Капинковски ќе се обидат да обезбедат позитивен резултат и да ја продолжат борбата за место на континенталниот собир.
Нашиот национален тим ќе настапи во група во која, покрај Македонија, се наоѓаат селекциите на Фарски Острови, Молдавија и домаќинот Холандија, што значи дека пред младите фудбалери стои сериозен предизвик.
Сите натпревари од групата ќе се одиграат во Холандија, а клучно ќе биде Македонија да прикаже дисциплинирана и борбена игра против квалитетните противници со цел да се избори за поволен пласман и евентуален пласман во следната фаза од квалификациите.
„Преку турнирите и тренинг камповите што ги организиравме во текот на изминатиов период имавме доволно време да се подготвиме за она што не очекува. За жал на овој турнир ќе настапиме без Ненад Дамјановски кој паузира поради потешка повреда, а во идентична ситуација се Александар Грашески и Стоилов кои се уште се рехабилитираат. Во моментов на располагање ги имаме најдобрите од оваа генерација и ќе направиме се за да се покажеме најдобро издание. Настапот во овие квалификации е одлична можност преку играње на натпревари со квалитетни противници да го стекнат потребното искуство кои многу ќе им помогне во текот на кариерата“, изјави Капинковски.
Прв противник ни е селекцијата на Фарски Острови, натпреварот се игра на 25 март со почеток во 17 часот. Три дена подоцна се соочуваме со домаќинот Холандија додека на 31 овој месец противник ни е Молдавија.
