Вечерва со натпреварот меѓу Јувентус Серава и Кеги Моби ќе биде отворено 5. коло од Првата футсал лига на Македонија. Натпревар каде и двете екипи силно ги посакуваат трите бодови и атакуваат на прво сезонско славје. Стартот на овој натпревар е во 21 часот.
В недела ќе се одиграат два натпревари. Клими во Кавадарци ќе го пречека Железарец каде гостинот е фаворит, а домакинот сака втора победа, во дуел кој стартува во 16 часот. Дербито на колото ќе го одиграат поранешните шампиони, повратникот Проект во Гевгелија го чека лутиот ривал Шкупи, а стартот на мечот е во 18 часот.
Во понеделник од 20:30 часот Бутел на домашен терен ќе бара прва победа против фаворитот Осогово од Крива Паланка, а 15 минути подоцна ќе започне натпреварот во Кавадарци каде „фенерџијата“ Црна Река ќе ги бара првите бодови против големиот фаворит Форца, каде шампионот ќе атакува на пет од пет.
