Скопски Бутел ја потврди фаворитската улога и со убедлива победа од 36-20 ја зацврсти трката за место во разигрувањето за титулата. Радовиш, и покрај желбата да се спротивстави, остана без бодови и ја продолжува тешката битка за опстанок во елитата.
Гостите од Радовиш добро го отворија мечот и до 16. минута имаа резултатска рамнотежа (7-7), но Бутел токму тука ја презеде контролата. Прво се одлепи на 10-7, а потоа и на 16-10 во финишот од првото полувреме — момент кога отпорот на Радовиш почна да попушта.
Продолжението донесе уште поубедлива игра на скопјани. За само неколку минути предноста порасна на „плус 10“ (22-12), а во текот на вториот дел Бутел рутински ја зголемуваше разликата, достигнувајќи максимални +16 за конечни 36-20.
На табелата Бутел сега има 13 бода, еден повеќе од Еурофарм 2 и еден помалку од Тиквеш — три екипи кои остануваат во тесна борба за двете места што носат пласман во Топ-6.
Кај победниците најдобар беше Димитар Узунчев со дури 11 погодоци, а Јапонецот Козаки додаде уште пет. За Радовиш најпрецизни беа Васе Петров и Славе Јанковски со по четири гола.
