ФК Преспа од Ресен се огласи со официјално соопштение по поднесената жалба на Детонит Плачковица, која бара натпреварот од 13. коло да биде регистриран со службени 3:0 поради наводна неправилна измена на играч до 21 година.
Според информациите што ги објави Спортска Мрежа претходно, клубот од Радовиш смета дека Преспа осум минути играла со двајца, а не со тројца млади играчи, што е спротивно на пропозициите.
Од Преспа категорично ја отфрлаат оваа интерпретација и тврдат дека сите промени биле во согласност со правилникот на ФФМ. Клубот достави свое јавно соопштение, во кое детално ја објаснува ситуацијата и испраќа силна порака дека нема да дозволи неправедно да биде казнет.
- СООПШТЕНИЕ НА ФК ПРЕСПА
“Во пресрет на натпреварот во Радовиш на ден 21.11.2025 година противник ни беше екипата на Детонит Плачковица, во еден фер и коректен натпревар со резултат 1:1, наш прв бод во гости! Поднесена е жалба од домашната екипа и е објавена по порталите за неправилна замена, ние натпреварот го започнавме со тројца играчи и го завршивме истиот со тројца играчи до 21 година според правилникот на официјалната страна на ффм! Никаде не е нагласено дека мора да на сите 90 минути да имаме тројца играчи на терен до 21 година!
Нашата борбра е за опстанок и секој бод ни е потребен нема да дозволиме да ни биде оддземен ке одиме до крајност! Жално е на децата кои изгинаа на терен да му се одземи бод кој можи многу да ни значи. Спортски поздрав до домакините за фер и коректниот натпревар”, се вели во соопштението на ФК Преспа од Ресен.
Фудбалската федерација на Македонија сега е на потег — Натпреварувачката комисија ќе треба да ги разгледа двете страни и да донесе конечна одлука.
