Фаворитот Вардар Неготино направи чекор назад кон битката за првото место кое директно води кон Суперлигата, иако е почеток на сезоната, сепак денешниот пораз на тимот на Пепи Манасков во Штип од екипата на Текстилец со 35:33 е јасен сигнал дека треба внимателност бидејќи конкурентите како Драчево Јуниор, Младост од Богданци и Мулти Есенс тоа го чекаат.
Дефинитивно големо изненадување направи штипскиот тим, кој стигна до третата сезонска радост, а пак Вардар Неготино го има вториот пораз во сезоната од пет натпревари.
Од самиот почеток тимот на Текстилец беше во резултатска предност, а која доаѓаше и до плус пет при 14:9 во 23. минута од средбата, а гостинот од Неготино постојано бркаше негатива.
Во 44. минута резултатот беше 25:25 со голот на Мирослав Митевски, но веднаш гостинот дојде и од водство преку погодокот на Костадин Петров на 25:26.
Пресврт на резултатот имаше во 55. минута со серија од два погодоци на домаќините за водство од 31:29, а до крајот Текстилец успеа да ја сочува предноста и да слави со 35:33.
Најрасположен за погодоци беше Јован Атанасовски со 11 погодоци, а кај гостинскиот тим се истакна Мице Шилегов со десет реализации.
