Македонската фудбалска репрезентација до 19 години, предводена од селекторот Ерхан Селими, оствари убедлива победа на гостувањето во Црна Гора, совладувајќи ја домашната селекција со 2:4 во вториот пријателски натпревар меѓу двете репрезентации.
Нашите млади фудбалери одиграа сигурен и офанзивен натпревар, при што имаа повеќе од играта и заслужено се радуваа на триумф. Македонија демонстрираше одлична колективна игра, ефективен напад и високо ниво на дисциплина во сите линии.
Првиот гол за Македонија го постигна Емир Шаботиќ од редовите на Вардар во првото полувреме. Домаќините успеаја да израмнат, но нашите млади репрезентативци повторно поведоа преку Горазд Ристовски од Црвена ѕвезда, кој беше сигурен реализатор од белата точка.
Црногорците повторно израмнија, но Адмир Љафити ја врати предноста на нашата селекција по голема грешка на домашниот голман. Љафити потоа со прекрасен соло продор и прецизен удар го постави конечниот резултат 2:4, потврдувајќи ја заслужената победа на Македонија.
Овој натпревар беше одлична контролка за претстојните квалификациски предизвици, а младиот состав на Селими уште еднаш покажа дека поседува голем потенцијал и квалитет за иднина.
