По четири кола и максимални 12 бода, Силекс ќе биде домаќин на Работнички во Кратово, во натпревар кој за „романтичарите“ доаѓа во момент на промени и обиди за нов почеток.
Во текот на репрезентативната пауза, клубот од „Градски парк“ назначи нов шеф на стручниот штаб – Турчинот Алпарслан Ердем, кој го наследи Бојан Маркоски. Освен тоа, беа донесени и неколку засилувања: Демир Имери од Шкупи, младинскиот репрезентативец Димитар Трајков (позајмица од Полисја – Украина) и Белул Елмазоски за офанзивната линија.
Офанзивецот Кристоџеј Далеј е свесен за тежината на гостувањето, но верува во подобар Работнички.
„Силекс е квалитетен тим, и секако не е лесно да се игра во Кратово. Но, ние работевме добро во овој изминат период, имаме нов тренер и неколку нови фудбалери и ќе се обидеме да стигнеме до позитивен резултат“, вели Далеј.
Работнички одигра само три натпревари во досегашниот тек на Првата лига, со оглед дека мечот против Шкендија е одложен, а има освоено еден бод и сѐ уште е без постигнат погодок. Во Кратово ќе има тешка задача да му стави крај на перфектниот старт на домаќинот.
