Младата репрезентација на Македонија до 15 години со триумф го отвори настапот на Светското првенство во форматот 7+1, кое се одржува во Баку, Азербејџан. Во премиерниот натпревар на турнирот, избраниците на селекторот Горан Станковски ја совладаа Панама со убедливи 4:1.
Македонските фудбалски надежи одиграа квалитетен натпревар и со четири постигнати гола заслужено стигнаа до првите три бода на шампионатот.
Најрасположен за игра беше Фисник Амити, кој двапати се запиша во листата на стрелците, додека по еден погодок постигнаа Доротеј Христов и Стефан Стојаноски.
Селекторот Горан Станковски на овој дуел се одлучи за следниот почетен состав: Марио Стојковски, Јетмир Асани, Дин Рожајац, Стефан Арсов, Давор Таневски, Јоан Ѓорѓиевски, Доротеј Христов и Јован Јанчевски.
Светското првенство во форматот 7+1 е дел од проектот на ФИФА насочен кон развој на младинскиот фудбал и стекнување меѓународно искуство кај младите играчи. Натпреварите се играат со седум фудбалери во поле и еден голман, а времетраењето е 40 минути, поделени во две полувремиња од по 20 минути.
Македонија во продолжението од групната фаза ќе се соочи со селекциите на Чад, Кенија, Малта и Нигер, во обид да обезбеди пласман во нокаут-фазата на турнирот.
