Македонската тенисерка Лина Ѓорческа продолжува со одличните настапи на романска земја и обезбеди пласман во полуфиналето на W75 турнирот во Букурешт. Во четвртфиналниот меч таа ја совлада Финката Лаура Хиетаранта со сигурни 2-0 во сетови (6-3, 6-3), меч кој траеше околу два часа.
Ѓорческа, која е поставена за четврта носителка, во првиот сет направи три брејка и од резултат 3-3 со серија од три добиени гема стигна до 6-3 и водство во сетови. Во вториот сет противничката тргна подобро и поведе со 2-0, но Лина брзо ја презеде контролата и со агресивна игра освои шест од следните седум гема за конечни 6-3.
За место во финалето Ѓорческа ќе се сретне со првата носителка Деспина Папамихаил од Грција, која во три сета (4-6, 6-3, 7-5) ја елиминира Романката Марија Попа. Во меѓусебните пресметки македонската тенисерка води со 3-1 во победи, а последниот дуел го доби минатиот месец во Куршумлијска Бања.
Турнирот во Букурешт се игра за награден фонд од 60.000 американски долари.
