Силекс со максимален ефект влегува во петтото коло од Првата лига – четири победи од четири натпревари, 12 освоени бодови, гол-разлика +12 и без примен погодок. Денеска (15:30 ч.) кратовци ќе бидат домаќини на Работнички, кој во првите три кола освои само еден бод, па овој меч носи големи очекувања кај домашната публика.
Напаѓачот на Силекс, Мартин Мирчевски, е уверен дека тимот е подготвен да ја продолжи серијата.
„На секој натпревар излегуваме на терен да дадеме се од себе и да победиме. Тоа е секогаш целта на Силекс, без разлика кој ни е противник“, рече Мирчевски.
Тој додаде дека акцентот е ставен исклучиво на играта на неговиот тим.
„Искрено, не би можел да кажам што би сменил новиот тренер кај Работнички. Посакувам само ние да сме во вистинското светло, па се надевам дека тоа ќе биде доволно за триумф. Посакувам еден убав меч во кој ќе победи подобриот противник. Задоволни сме од тоа како ја започнавме сезоната. Имаме одлични четири победи од исто толку натпревари, и сето тоа е мотив за нас да ја задржиме оваа победничката серија што е можно подолго“, изјави Мирчевски.
Со ваква форма, Силекс влегува како голем фаворит против „романтичарите“, кои ќе се обидат да изненадат и да го прекинат перфектниот старт на кратовци.
