Македонскиот футсал испишува нови страници на својата историја! Екипата на Форца од Куманово обезбеди пласман во главната групна фаза на Лигата на шампионите, каде што ќе се натпреваруваат најдобрите 32 тима на Стариот континент.
Во одлучувачкиот натпревар од квалификациската група, одигран во Куманово, македонскиот првак беше феноменален и го совлада првакот на Ерменија, Ереван, со убедливи 5-0. Кумановци целосно доминираа на паркетот и со стил ја заверија историската победа.
Форца претходно ги победи и Енкамп од Андора со 4-0 и Мурата од Сан Марино со 1-0, со што ја заврши групата А на првото место и обезбеди пласман меѓу европската елита.
Овој успех е уште поголем ако се знае дека екипата ја води Газмент Исеини, кој неодамна беше именуван и за селектор на македонската футсал репрезентација. Со неговото водство, Форца покажа извонредна тактичка зрелост и квалитет кој го издигна мак-футсалот на повисоко европско ниво.
Своите противници во главната групна фаза, кумановци ќе ги дознаат следниот месец, а љубителите на футсалот во Македонија со нетрпение го очекуваат продолжението на европската приказна.
