Фудбалскиот клуб Слога 1934 од Виница го засили својот состав во пресрет на новата сезона во Втората македонска фудбалска лига, ангажирајќи двајца фудбалери кои ќе го облечат црвено-белиот дрес.
Првото засилување е добро познато име за виничани – Даниел Иванов, кој повторно се враќа во клубот. Тој доаѓа од шведската екипа Малме Македонија, а во минатото настапуваше за повеќе македонски второлигашки клубови, оставајќи силен впечаток со својата игра и искуство.
Второто ново име е голманот Максим Краљевски, кој пристигнува од младинскиот погон на Вардар. Тој важи за еден од најперспективните млади голмани во државата, а беше клучна алка во младинската шампионска генерација на „црвено-црните“.
Од клубот истакнуваат дека двете нови засилувања ќе донесат свежина и квалитет во составот и дека од нив се очекува значаен придонес во остварувањето на амбициите за претстојната сезона.
