Екипата на Македонија Ѓорче Петров ги започна подготовките за новата сезона, а во која сезона ќе атакува првите две позиции, првото место води директно кон Суперлигата, а пак второто место води кон баражот за елитата.
„Дробилицата“ го имаше првиот собир и првиот тренинг на отворено, а потоа ќе се тренира во сала, по што ќе следуваат и пријателските натпревари за проверка на формата.
Клубот се засили со бековите Бобан Петров и Дарко Рангелов, а клубот ги претстави и Александар Грујевски кој игра на крилната позиција, како и Обрен Фичуроски кој ќе биде одлично засилување во одбраната. Како што дознава Спортска Мрежа клубот од Ѓорче е во финална фаза од преговорите со четири ракометари.
Клубот ќе го води Дејан Цветановски, а се задржани клучните играчи од минатата сезона.
„Особено сме горди што во конкуренција влегуваат и нашите младинци, кои ќе собираат драгоцено прволигашко искуство. Во кадетска конкуренција при крај се преговорите со седум нови играчи кои би се придодале на минатогодишниот ростер со што сигурно би се бореле за едно од првите три места во групата и пласман на Ф-4. Во пионерска лига исто така ќе се бориме за висок пласман, а доколку се остварат најавите за оформување на лига за мини ракомет ќе пријавиме сигурно една или две екипи. Работиме на долгорочен план да обезбедиме играчи од сопствен погон. Во исто време инвестираме и во развој на тренерскиот кадар. На модулот за тренери што ќе се одржи оваа есен од нашиот клуб ќе бидат испратени двајца млади тренери“, велат од клубот за Спортска Мрежа.
Македонија ЃП новата сезона ја отвара против Мулти Есенс, што значи дека уште во рамки на првото коло ќе гледаме дерби, а новата сезона треба да започне на 13/14 септември.
Новата сезона ќе биде навистина неизвесна кога е во прашања позициите кои водат кон Суперлигата, покрај Македонија ЃП, отворени планови и амбиции имаат и Младост од Богданци, Драчево Јуниор и Мулти Есенс.
