Второлигашот Скопје се засили со неколку нови фудбалери за сезоната која започнува на 23 август, а во неа ќе влезе и со нов тренер – откако на тренерското столче седна искусниот Александар Таневски. Тој доаѓа на местото на Љупчо Марковски – Калц, кој сега е нов тренер на Шкендија од Арачиново.
Таневски е тренер со богато искуство, кој во својата кариера ги водеше Македонија ЃП, Брера Струмица, Беса од Добро Дол, а неодамна беше именуван и за селектор на македонската репрезентација до 20 години.
Тимот од Автокоманда, под водство на 42-годишниот стратег, минува низ успешни подготовки и во новата сезона ќе влезе максимално подготвен, засилен и освежен.
Поранешниот прволигаш се засили со Александар Ѓурковски и Горјан Цветков, кои во пакет пристигнаа од Вардар, потоа со Јорго Папули од Кожуф, за кој трансфер веќе објави Спортска Мрежа, а ново име е и Александар Анастасијески од Македонија ЃП.
Како што дознава Спортска Мрежа, со екипата на Скопје тренираат и неколку играчи од генерациите 2005–2009 од повеќе клубови. Во следните денови ќе се одлучува кои ќе останат. Во групата има и неколку играчи од Работнички, двајца од тетовска Шкендија и еден од Струга Трим Лум.
Со тимот од Автокоманда тренира и Виктор Ангелов, поранешен репрезентативец.
„Во наредните денови очекуваме да пристапат уште неколку играчи, со цел да направиме конкурентен тим, чија основа ќе бидат млади талентирани фудбалери – потенцијални кандидати за младите репрезентации. Одигравме два пријателски натпревари, од кои можевме да видиме со каков квалитет располагаме“, изјави шефот на стручниот штаб Александар Таневски за Спортска Мрежа.
Новата сезона екипата на Скопје ја отвора на домашен терен, пред својата верна публика, против повратникот Слога од Виница.
