Екипата на Пелистер Волеј продолжува со амбициозното засилување на составот за претстојната сезона, а најново име во зелено-белиот дрес е репрезентативката на Македонија и искусен среден блокер, Мартина Николова.
Таа доаѓа од редовите на Работнички Скопје и зад себе има блескава клупска и репрезентативна кариера, исполнета со бројни трофеи и признанија.
Николова е вистинско шампионско засилување за битолскиот прволигаш – во својата кариера има освоено дури четири шампионски титули и три двојни круни во македонската одбојка. Првите трофеи ги освои во сезоната 2018/19, кога стана и шампион и куп-победник на Македонија.
Истото сценарио го повтори во сезоните 2021/22 и 2022/23, со што ја потврди својата константност и врвно ниво на игра. Освен домашните успеси, Николова има настапувано и на меѓународната сцена, освојувајќи го петтото место на Балканскиот куп (BVA Cup) во 2023 година и учествувајќи во Челенџ купот. Истиот период беше и дел од сениорската репрезентација на Македонија во Европската сребрена лига.
Со своето големо искуство, сигурна игра и лидерски квалитети, Николова се очекува да биде од огромно значење за тимот на тренерскиот штаб на Пелистер Волеј. Битолчани ова лето веќе донесоа неколку квалитетни засилувања – Белорусинката Алина Жевлакова, Американката Шиник Никол Мекги, како и македонските одбојкарки Ева Трпеновска и Симона Стојановска.
Овие потези јасно ја потврдуваат намерата на Пелистер Волеј да се бори за највисок пласман и да ја зацврсти својата позиција меѓу најдобрите во македонската женска одбојка. Со доаѓањето на Николова, тимот добива проверен шампион кој знае како се освојуваат титули и кој ќе биде клучен дел од новата зелено-бела приказна.
