Еден од најдобрите македонски одбојкари, Никола Ѓорѓиев, ќе има нова дестинација во својата богата интернационална кариера. Во сезоната 2025/26 тој ќе го носи дресот на романскиот прволигаш Рапид Букурешт.
Трансферот го потврди самиот Ѓорѓиев преку објава на социјалните мрежи, каде откри дека со нетрпение го очекува почетокот на новата авантура.
„Во мојата 21-ва интернационална сезона ќе играм за екипата на Рапид Букурешт од Романија. Ова ќе биде деветта земја во која ќе настапувам и едвај чекам да ги запознаам моите нови соиграчи, тренери и фанови. Ќе дадеме сè од себе за да освојуваме трофеи. Нека биде Бог со нас“, напиша Ѓорѓиев.
Со преселбата во Романија, Ѓорѓиев ќе запише настап во деветтата земја од својата богата интернационална кариера. Претходно играше во Македонија, Словенија, Германија, Полска, Турција, Јапонија, Србија и Италија. Со над 20 години искуство на највисоко ниво, македонскиот репрезентативец ќе биде огромно засилување за амбициозниот состав на Рапид Букурешт.
