ГФК Тиквеш активно работи на оформување на ростерот за сезоната 2025/26, задржувајќи ги клучните фудбалери кои оставија значаен белег во изминатиот шампионат на Првата македонска фудбалска лига.
По продолжувањето на договорот со офанзивецот Александар Мишов, клубот од Кавадарци официјално објави дека уште двајца важни фудбалери ќе продолжат да го носат црвено-белиот дрес – Кристијан Стојкоски и Даниел Миловановиќ.
Стојкоски, кој веќе две сезони е дел од Тиквеш, потпиша нов едногодишен договор. Минатата сезона беше еден од најстандардните играчи во тимот, со 29 настапи и три постигнати погодоци. Неговата брзина, издржливост и искуство ќе бидат клучни и во претстојната сезона. Во кариерата претходно има настапувано за Македонија ЃП, Работнички, Шкупи и Академија Пандев сега Брера Струмица.
Одбранбениот фудбалер Миловановиќ, иако имаше активен договор уште шест месеци, постигна договор за продолжување на соработката за дополнителни шест, со што ќе остане во Кавадарци до крајот на сезоната 2025/26.
26-годишниот дефанзивец беше стабилен дел од одбраната на Тиквеш, а во својата кариера има настапувано и за италијанскиот Масесе, унгарскиот Залаегерсег, како и за Брера Струмица.
Виолета Јанчева, Спортска Мрежа
