Утрешниот ден, недела, клучен за пионерите на Вардар Неготино. Најголемото внимание е насочено кон пионерскиот тим, кој во последното коло од Третата пионерска лига – Група А, ќе го пречека тимот на Малеш од Берово.
Натпреварот, кој се игра на Градскиот стадион во Неготино со почеток во 13:00 часот, ќе одлучува кој да биде прв во групата А и да игра со првиот од групата Б, за севкупен првак т.е. шампион во Третата пионерска лига. Во групата Б во последното 21. коло Борец и Куманово Милано ќе решаваат кој да биде прв. Вардар Неготино моментално е лидер на табелата во групата Б со 42 бодови – исто колку и Академија Осогово, додека Слога Виница е веднаш зад нив со 41 бод, како трета. Победа значи сигурно прво место за црно-белите од Неготино и со тоа ќе закажат пресметка со велешки Борец или Куманово Милано.
Поддршката од публиката ќе биде од клучно значење. Тимот апелира до навивачите, до верните „винари“ и целата фудбалска јавност од Неготино да дојдат и да ги поддржат младите надежи на неготинскиот фудбал во обидот да ја крунисаат сезоната со титула.
Претходно, со почеток во 11:00 часот, помладите пионери исто така ќе се соочат со врсниците од Малеш, додека фудбалскиот ден ќе го заокружи сениорскиот тим на Вардар Неготино. Избраниците на тренерот Горан Тодорчев од 17:00 часот го играат последниот натпревар од сезоната во Втората лига, пред својата публика против екипата на Арсими.
Недела во Неготино носи фудбалска возбуда и борба за крунисување на успешна сезона!
