Екипата на Бујковци е шампион во Општинската фудбалска лига Гази Баба и ќе се подготвува за бараж натпреварот за влез во Третата македонска фудбалска лига – Север.
На три кола до крајот, екипата на Бујковци, на 17 одиграни натпревари, има учинок од 15 победи, едно реми и еден пораз, при што тимот постигна 57 гола, а прими само 11. Тоа значи дека екипата на Бујковци доминираше, бидејќи има најдобар напад и најдобра одбрана во лигата.
Со овој учинок, тимот има 46 бодови на своето конто, додека на второто место е екипата на Долно Коњари, која има 38 бодови, но има одиграно натпревар повеќе од лидерот.
За клубот ова е историска сезона и голем успех – пехарот ќе добие соодветно место во витрините на клубот и ќе биде потврда за оваа златна генерација на играчи кои испишаа историја. Сега клубот ќе се подготвува за баражот за влез во Третата лига – Север.
„Официјално добивме потврда од ОФС Гази Баба на чело со претседателот Дарко Костовски дека ФК Бујковци е шампион на ОФЛ Гази Баба за сезона 2024/25 и дека ќе игра бараж натпревар за влез во Трета лига – Север. Бујковци е мало место кое треба да се гордее со овој успех и никогаш да не ги заборави овие златни момци кои со сето свое знаење, искуство и пред сè срце го впишаа Бујковци на фудбалската карта. Честитки за освоената титула која сигурно ќе најде соодветно место во витрините на фудбалскиот клуб и нека трае оваа бујковска фудбалска бајка што е можно повеќе и со уште поголеми успеси од овој. За прославата на титулата и бараж натпреварот ќе бидете дополнително известени! Славете го овој успех, бујковчани, зошто шампион не се станува секој ден!“, се вели во соопштението на клубот.
Првата цел на клубот е исполнета – шампионскиот пехар во ОФЛ Гази Баба (четврта лига по ранг на натпреварување), а сега втората цел ќе биде да се помине баражот и тимот да настапува во Третата лига – Север во следната натпреварувачка сезона 2025/2026.
