Арсими се доближи до бараж зоната за Прва лига, Македонија ЃП и Башкими убедливи, реми во Радовиш

Фаворитите одиграа според планот, само штипјани се „сопнаа“ и ремизираа, денес беа одиграни одложените натпревари од 21. коло на Втората лига, а сите мечеви запознаа со минута молк поради трагедијата во Кочани.

Башкими според планот забележа голема победа над Вардар Неготино од 5:2 со што трите бодови останаа во Куманово, а тимот на Башкими продолжува да го трасира патот кон Првата лига.

На полувреме домаќинот со головите на Амар Имери и Аган Сулимани имаше предност од два гола. Во вториот дел Аган Алиу погоди за 3:0, а потоа Никола Павлески со два брзи гола во 53. и 61. минута намали на 3:2 и ја врати неизвесноста на мечот, но тимот на Горан Тодорчев во финишот од мечот прими два погодоци со што победникот беше решен.

Новото засилување Аљбан Мемеди погоди за 4:2, а пак искусниот голгетер Хусеин Демири ги постави конечните 5:2, а со овој пораз Вардар Неготино ја продлабочува резултатската криза.

Охрид ремизираше со Победа во меч без голови (0:0), а овој меч наместо на „Билјанини Извори“ во Охрид се играше на стадионот во Струга.

Детонит Плачковица и Кожуф ги поделија бодовите откако одиграа 1:1 во Радовиш. Домаќинот преку Дамјан Масевски прв дојде до водство од 1:0, а во вториот дел гостинот од Гевгелија преку Филип Ѓорѓиевски дојде до конечните 1:1.

Немаше победник ниту во Штип, каде Брегалница и Скопје ремизираа играјќи 1:1, во меч каде „пиратите“ со атрактивно голчиште на искусниот Иво Јанакиевски дојдоа до водство во 14. минута. Во вториот дел младиот Благој Хаџи-Кимов постигна гол за конечни 1:1.

Беласица забележа висока и сигурна победа од 3:0 против Новаци, со што гостинот ја продлабочува резултатската криза. Димче Јовов погоди за 1:0 на полувреме. Во второто полувреме Максим Цониќ постигна гол за 2:0, а конечниот резултат го постави искусниот Бојан Најденов во 92. минута.

Македонија ЃП го декласираше Вардарски во целост со 4:0, откако најдобриот стрелец Симеон Христов постигна два гола, а по еден гол постигнаа Кире Маркоски и новото засилување Анџело Николовски.

Борец ја продолжува резултатската криза и тимот е се поблиску до директно испаѓање во Трета лига – Југ, откако го загуби дербито од дното и со Осогово на домашен терен од 1:3. „Жетварите“ победата ја посветија на 59-те жртви од големата трагедија во Кочани, а ова победа значи дека Осогово оди кон тоа да обезбеди и директен опстанок.

Фудбалерите на Осогово на загревање истрчаа со црни маички со кои се искажа длабоко сочувство за трагедијата, а во фудбалерите на левата рака носеа црни траки, додека пак Борец исто така се загреваше во црни маички.

Владимир Жоглев по четири минута постигна гол за 0:1 и водство на полувреме. Во вториот дел со гол од пенал Кристијан Ристовски погоди за 0:2, а четири минути подоцна односно во 60. минута Жоглев со втор гол зголеми на 0:3. Во финишот од мечот или во 82. минута нововлезениот Матеј Панов ги постави конечните 1:3.

Арсими однесе висока и убедлива победа од 4:1 против Каменица Саса и продолжува да ги напаѓа местата кои водат кон Првата лига. Најдобриот стрелец на клубот Аљбин Рамадани беше двоен стрелец, а по еден гол постигнаа Малиќ Белули и Аљбин Таипи, а пак за „рударите“ погоди Тони Мичковски.

• ЦЕЛА ТАБЕЛА ОД ВТОРА ЛИГА: