Изненадувачки во текот на вчераниот ден ракометниот суперлигаш Радовиш се одлучи да направи тренерска промена и на местото на младите тренери Спасе Ѓоргиев и Александар Долдуров е поставен Игор Котевски. Новиот стратег на радовишани вчера во СРЦ „25 Мај“ во Радовиш го имаше и првиот тренинг со новата екипа.
Ѓоргиев и Долдуров го водеа Радовиш до ракометна сензација откако минатата сезона како второпласирани во Првата лига во баражот го совладаа тогаш суперлигашот Еурофарм Пелистер 2 и направија експресно враќање во Суперлигата. Дополнително, клубот во првиот дел од сезоната имаше поголеми потешкотии во функционирањето што се рефлектираше врз самата игра.
Никој не веруваше во такво чудо дека Радовиш ќе може преку бараж да се врати во Суперлигата, не само во ракоментата јавност туку и меѓу радовишката, но младите тренери успеаја да направат ракометна сензација.
Радовиш ќе води борба за опстанок во Суперлигата за што во изминатиот период клубот е во променет ростер со квалитетни играчи, а сега доби и нов тренер во името на искусниот Игор Котевски. Во својата кариера новиот тренер на радовишани ги предводеше екипите на Вардар од Неготино, Јуниор КВ, Голден Арт, Металург РА и Металург, Бутел Скопје, Македонија ЃП и екипата на Драчево.
Клубот се’ уште не го има промовирано Котевски за нов тренер, но тој е во Радовиш и веќе работи со екипата. Според нашите информации Ѓоргиев и Долдуров остануваат во стручниот штаб сега како помошници на Котевски.
Дебито на клупата на Радовиш, новиот тренер ќе го има против шампионот Еурофарм Пелистер, но овој меч наместо во Радовиш ќе се игра во Битола, па радовишката јавност ќе имаат „слободен викенд“ и клубот ќе може да го гледа на YouTube или оние кои се во можност да отпатуваат во Битола, в недела од 13 часот.
