Ракометната школа на Младост 1977 од Богданци продолжува да создава млади ракометни таленти. Стојан Иванџиков и Даниел Милановски, членови на клубот од Богданци, се најдоа на списокот на селекторот Никола Матлиески за машката пионерска репрезентација на Македонија до 16 години и претстојниот регионален турнир во Црна Гора.
Иванџиков настапува на позицијата десен бек, додека Милановски игра како десно крило. Повикот претставува значајно признание за нивниот талент, посветеност и континуирана работа, но и потврда за квалитетот на младинската школа на Младост 1977 Богданци.
Посебно внимание привлекува фактот што Стојан Иванџиков веќе го почувствува предизвикот на сениорскиот ракомет, настапувајќи во Суперлигата, а сега добива можност заедно со својот клупски колега Даниел Милановски да се докажува и на репрезентативно ниво.
Ракометната федерација на Македонија воведува нов начин на организација на процесот за селекција на пионерската машка репрезентација, со цел да овозможи пошироко следење и поквалитетна проценка на младите ракометари од целата држава.
Генерацијата ракометари до 16 години ќе има уште една значајна можност за меѓународно докажување. Оваа селекција ќе учествува и на Медитеранските игри, кои ќе се одржат во Скопје од 18 до 25 април 2027 година.
Настапот на овој голем спортски настан ќе биде можност младите ракометари да стекнат драгоцено натпреварувачко искуство, да напредуваат и да се подготвуваат за идните предизвици во младинските и сениорските национални селекции.
Собирот на повиканите ракометари е закажан за 3 ноември 2026 година, во 10:00 часот, во спортската сала „Расадник“ во Скопје.
Но, има уште многу ракометни таленти во РК Младост 1977 кои веќе се наметнуваат во тимот, а кои таленти уште сега се на пик за сениорскиот тим, ракометари од генерација 2012 и помали кои играат во Пионерската лига и каде немаат пораз.
РК Младост 1977 е голем ракометен расадник, Богданци можеби е мало место, но постојано ги „храни“ репрезентациите на Македонија со талентитани ракометари.
Уште една потврда дека РК Младост 1977 од Богданци важи за најдобра ракометна школа во Југоистокот од Македонија.
