Фудбалскиот клуб Победа од Пепелиште се враќа на фудбалската мапа по повеќе од 35 години, а новата сезона ќе ја дочека со сериозно подготвен состав и амбиции за што повисок пласман во Трета лига – регион 4.
Минатата сезона Победа настапуваше во Општинската фудбалска лига во Неготино, но со обезбедувањето на пласман во повисок ранг клубот направи значаен чекор во својата историја. Управата и играчкиот кадар се уверени дека со добро подготвениот тим можат да бидат конкурентни во новото друштво.
Во пресрет на сезоната, екипата од Пепелиште се засили со повеќе фудбалери со второлигашко и третолигашко искуство, но и со неколку млади и перспективни играчи. На голманската позиција пристигна 18-годишниот Илија Петрески, кој доаѓа од младинскиот погон на ГФК Тиквеш.
Одбраната доби неколку нови имиња. Мартин Темелковски пристигнува од ФК Росоман, по минатото во младинската школа на Академија Пандев/Брера и Вардар Неготино. Златко Лазаров, пак, е само 16-годишен левак кој доаѓа од младинците на Вардар Неготино и игра на позицијата стопер. Од клубот го опишуваат како борбен и технички добро подготвен фудбалер.
Дополнително засилување е и Иле Велков, искусен фудбалер кој има настапувано за Малеш Берово и Струмичка Беласица, а може да одговори на позициите десен бек и заден везен.
Средниот ред ќе биде посилен со Трајче Карпачев, кој доаѓа од младинците на ГФК Тиквеш, како и со повратникот Дуле Пауновиќ, кој минатата сезона настапуваше за Венец. Карпачев треба да донесе дополнителна креативност и техника во играта, додека Пауновиќ со своето искуство ќе биде значаен дел од тимот.
Во офанзивата нови имиња се Драги Ангеловски, кој пристигнува од Напредок Војшанци, Денис Мемков од Вардар Неготино, со претходно искуство во Локомотива Градско, како и Мартин Младеновиќ, кој исто така доаѓа од Вардар Неготино, каде што настапуваше во Втората македонска фудбалска лига. Младеновиќ е млад, брз и експлозивен фудбалер од кого во Пепелиште очекуваат многу. За дополнителна сигурност и искуство во тимот е ангажиран и Горан Соколов, кој може да игра на повеќе позиции.
Комплетниот ростер на Победа Пепелиште го сочинуваат голманите Илија Петрески, Доне Јанев и Александар Јанев, дефанзивците Виктор Аризанов, Иле Велков, Горан Стојанов, Горан Митрев, Мартин Темелковски, Златко Лазаров, Антонио Дојков, Панче Станковиќ и Тоше Темелковски, играчите за врска Трајче Карпачев, Васко Димитриев, Дуле Пауновиќ, Живко Пауновиќ и Јован Наумов, како и напаѓачите Мартин Младеновиќ, Горан Соколов, Дејан Усинов, Реџеп Амков, Драги Ангеловски, Назми Ализотов, Трајче Илиев, Драган Моневски и Денис Мемков.
Пред официјалниот старт на првенството, Победа ќе ја има последната проверка во недела од 17:00 часот, кога на „Мацо Арена“ во Пепелиште ќе го пречека Дојранско Езеро. Тоа ќе биде последна можност за стручниот штаб да ги провери силите пред првиот натпревар за бодови. Стартот на сезоната е закажан за 12/13 септември, кога Победа ќе биде домаќин на Питу Гули од Крушево.
Од клубот истакнуваат дека голема заслуга за враќањето на Победа на фудбалската мапа имаат сите спонзори, помагатели и спортски работници кои вложиле труд, време и финансиски средства за проектот да стане реалност. Управата и фудбалерите најавуваат дека ќе ја оправдаат довербата и ќе се обидат да испишат нова успешна страница во историјата на клубот.
