Македонскиот сениорски репрезентативец Тоше Ефремов и во следната сезона ќе го носи дресот на словенечки Чрнуче. Екипата минатата сезона избори пласман во Суперлигата и се потруди да го задржи костурот на тимот, а меѓу оние кои ја продолжија верноста кон клубот е и Ефремов.
„Многу сум среќен што следната сезона ќе имам можност да настапувам во словенечката Суперлига. Благодарен сум на Чрнуче за довербата и за можноста што ми ја дадоа. Минатата сезона клубот ми даде голема шанса да се покажам и да стекнам важно искуство, а сега сум мотивиран да направам уште еден чекор напред. Чрнуче веќе ми е позната средина, бидејќи со дел од играчите играв и минатата сезона. Тоа ми дава дополнителна мотивација и верувам дека ќе ми помогне уште подобро да се вклопам во екипата. Свесен сум дека Суперлигата носи поголема конкуренција и посилни натпревари, но токму тоа е предизвикот што го барам. Сакам да ја оправдам довербата што ми е дадена, да дадам максимум за екипата и преку секој тренинг и натпревар да продолжам да напредувам. Горд сум што како млад македонски одбојкар имам можност да ја претставувам Македонија и надвор од нашата земја. Целта ми е да продолжам да работам, да бидам сè подобар и со моите настапи да покажам дека и македонската одбојка има млади играчи кои можат да се натпреваруваат на високо ниво. Верувам дека ме очекува одлична сезона и со нетрпение го очекувам новиот предизвик“, вели Тоше Ефремов.
За 18-годишниот Ефремов претстојната сезона ќе биде петта интернационална во неговата кариера, а втора во Словенија. Претходно младиот македонски одбојкар настапуваше во Србија за Раднички Крагуевац, како и во Хрватска за Рибола Каштела.
Ефремов потекнува од школата на Весна Пробиштип, додека во домашното првенство има настапувано и за Струмица Никоб.
Младиот одбојкар продолжува да го гради своето интернационално искуство, а новата сезона во Словенија ќе биде уште една можност за дополнителен развој и наметнување на европската сцена.
