Најдобрите македонски одбојкари по четвртипат во низа ќе бидат дел од Европското првенство. По дебито на континенталните собири во Љубљана во 2019 година, Македонија продолжи да испишува историја и обезбеди настап и на ЕП 2021 во Тампере, Финска, а потоа во 2023 година беше и ко-домаќин на континенталниот шампионат, кога во Скопје се играа натпревари од групната фаза.
Следниот предизвик за македонската репрезентација ќе биде ЕвроВолеј 2026, кој ќе се одржи од 9 до 26 септември во Италија, Бугарија, Финска и Романија.
Македонија од 9 до 17 септември ќе настапува во групата Б, чии натпревари ќе се играат во Софија. Нашата селекција за противници ќе ги има домаќинот Бугарија, светскиот вицешампион Полска, Украина, Португалија и Израел.
Интересно е што покрај Македонија, и Португалија, која е наш ривал во групната фаза, испиша идентичен успех – по четвртипат во низа обезбеди пласман на Европското првенство.
Во пресрет на ЕвроВолеј 2026, издвојуваме уште неколку интересни бројки и факти:
- 34. издание на Европското првенство во одбојка ќе се одржи од 9 до 26 септември 2026 година, во организација на Италија, Бугарија, Финска и Романија.
- Ова ќе биде четврто Европско првенство откако е воведен системот со повеќе организатори, кој за првпат беше применет во 2019 година.
- 24 репрезентации, поделени во четири групи со по шест селекции, ќе играат во групната фаза од 9 до 17 септември.
- Натпреварите од групната фаза ќе се играат во пет европски градови: група А во Наполи и Модена, Италија, група Б во Софија, Бугарија, група Ц во Тампере, Финска и група Д во Клуж, Романија.
- Големото финале е закажано за 26 септември во „Унипол Форум“ арената во Асаго, предградие на Милано, со капацитет од 12.800 гледачи.
- Европскиот шампион од ЕП 2026 ќе обезбеди директен пласман на Олимписките игри 2028 во Лос Анџелес.
- Првите три репрезентации на ЕвроВолеј 2026 ќе обезбедат место на Светското првенство 2027 во Полска.
- Првпат по ЕП 1967, четирите полуфиналисти од последното Светско првенство во 2025 година ќе настапат на исто Европско првенство. Тоа се светскиот шампион Италија, вицешампионот Бугарија, бронзената Полска и четвртопласираната Чешка.
- Италија е последната репрезентација која успеала истовремено да биде светски и европски шампион. Италијанците го освоија Светското првенство во 1998 година, а само една година подоцна, во 1999, стигнаа и до европскиот трофеј.
За Македонија ова ќе биде нова можност за уште еден историски настап на најголемата европска одбојкарска сцена. По три последователни учества, „црвено-жолтите“ веќе имаат стекнато драгоцено искуство од големите натпреварувања, а во Софија ќе се обидат да направат уште еден чекор напред.
Пред македонските одбојкари е исклучително тешка група, но и голем предизвик. Секој освоен сет и секој бод против силната европска конкуренција ќе биде можност Македонија повторно да го покаже својот квалитет и да продолжи со континуитетот на големите натпреварувања.
