Новата прволигашка сезона носи сериозни засилувања во редовите на Фламинго Волеј, кој во пресрет на историскиот настап во највисокиот ранг ангажираше три одбојкарки со прволигашко искуство – Мартина Азманова, Викторија Трајкова и Теона Славкова.
Азманова пристигнува од Наковски Волеј, каде долги години беше прво либеро и еден од клучните делови на тимот. Минатата сезона настапи во финалето на плеј-офот и Купот на Македонија, освојувајќи две сребрени медали. Зад себе има и настапи за сите млади репрезентативни селекции на Македонија.
На позицијата среден блокер Фламинго го засилува Викторија Трајкова, исто така од Наковски Волеј. Таа веќе има значајно прволигашко искуство, а минатата сезона освои две сребра – во првенството и Купот на Македонија. Една сезона претходно, Трајкова се закити и со куп-титулата. Била дел од кадетската и младинската репрезентација на Македонија.
Третото засилување е Теона Славкова, која ќе настапува на позицијата примач. Славкова во кариерата има настапувано за Вардар Жени, со кој во 2021 година освои сребро и во првенството и во Купот на Македонија, а прволигашко искуство има и во дресот на Работнички. Како и Азманова и Трајкова, таа има репрезентативно искуство во младинските селекции на Македонија.
Со ангажманот на трите одбојкарки, Фламинго добива дополнително искуство, квалитет и сигурност во пресрет на дебитантската сезона во Првата лига. Азманова ќе биде важна за одбраната, Трајкова за играта на мрежата, додека Славкова треба да донесе стабилност во приемот.
