Успешен настап за македонските биатлонци на IBU Regional Summer Balkan Cup, кој викендов се одржа во Делнице, Хрватска. Македонската биатлон федерација настапи со свои натпреварувачи во повеќе возрасни категории, а нашите претставници освоија медали во категориите У21, У19 и У17 во машка конкуренција, како и во детските категории.
На денешните натпревари во дисциплината спринт на 7,5 километри, Македонија освои четири медали. Во категоријата У21, второто место му припадна на Благоја Најденоски, додека трет беше Тео Петрушу. Во У19, бронзениот медал го освои Душан Божиноски, а во категоријата У17, Александар Јорданоски стигна до второто место.
Успешен настап македонските биатлонци имаа и на вчерашните трки. Во спринтот на 7,5 километри, Тео Петрушу го освои третото место во категоријата У21, додека Душан Божиноски беше трет во У19.
Медали за Македонија имаше и во детските натпревари со ласерска пушка на 1,5 километри. Петар Николоски го освои првото место во категоријата У12, додека Јаков Трајаноски заврши на третата позиција. Во У14, Тео Стоиловски го освои петтото место.
Овие натпревари се дел од летниот IBU Balkan Regional Cup, на кој се собираат најдобрите биатлонци од балканските земји. Резултатите од натпреварите се бодуваат за IBU поени, што дополнително го зголемува значењето на постигнатите резултати.
Со оглед на силната конкуренција и учеството на претставници од сите балкански држави, освоените медали претставуваат значаен успех за македонскиот биатлон и потврда дека младите македонски натпреварувачи се движат во вистинска насока.
Селекторот Ѓоко Динески очекува позитивниот тренд да продолжи и на следните натпревари, со уште подобри резултати и обезбедување пласман на повисоките нивоа на светските натпревари.
