Уште еден голем успех за македонскиот тенис. Само на 15 години, Марко Алексовски го освои Tennispark Pointer Open 2026 J30 Скопје и стана најмладиот македонски тенисер со титула на ИТФ турнир во конкуренција до 18 години.
Алексовски во финалето беше убедлив против Сергеј Артемев, кого го совлада со 2-0 во сетови (6-2, 6-3), крунисувајќи ја одличната недела со шест победи – три во групната фаза и три во нокаут-фазата.
Најголема борба имаше уште на стартот, кога по голема драма го совлада Британецот Лиан Шејкли со 2-1 (7-6/2, 4-6, 10-3). Потоа следуваа убедливи победи над Матвеј Лиамин (6-2, 6-1) и Бугаринот Никола Божилов (6-2, 6-4).
Во четвртфиналето Алексовски го елиминираше Добромир Манолоф од Бугарија со 6-3, 4-0, додека во полуфиналето беше подобар од Романецот Алберт Иван со 6-3, 6-3.
За младиот македонски тенисер ова е прва ИТФ титула во конкуренција до 18 години, по одличните настапи во изминатиот период. Претходниот месец Алексовски играше финале на турнир во Солун, а стигна и до полуфиналето во Софија.
Одличен настап на турнирот имаше и Ерион Незири, кој стигна до полуфиналето во поединечна конкуренција кај момчињата.
Во конкуренција на двојки, Мила Јовановски и Романката Марија Бозу стигнаа до финалето, каде што по голема борба загубија од Барбара Бидзила од Чешка и Лиор Ивевц од Израел со 1-2 (6-1, 4-6, 8-10).
Кај девојчињата, титулата во поединечна конкуренција ја освои Американката со македонско потекло Софија Димитријевиќ.
