Екипата на Башкими ја очекува нова можност за прва победа во новата сезона од Првата македонска фудбалска лига. Во рамките на 5. коло, кумановскиот тим на домашен терен ќе ја пречека Шкендија Арачиново, која досега освои четири бода во својата дебитантска сезона во елитата, со една победа и едно реми.
Домаќините влегуваат во натпреварот со јасна цел – конечно да стават крај на лошиот старт на сезоната и да го освојат првиот бодовен плен. Башкими по првите четири кола е без освоен бод, а дополнителна причина за загриженост е фактот што тимот сè уште нема постигнато ниту еден гол, додека противниците дури 15 пати ја тресеа неговата мрежа.
Шкендија Арачиново, пак, ќе се обиде да ја продолжи борбата за позитивни резултати и да се врати на бодовите по поразот од Арсими во минатото коло.
„Нè очекува исклучително важен натпревар против Шкендија Арачиново. По лошиот почеток, се надеваме дека ќе им се вратиме на победи за да ги израдуваме нашите навивачи“, изјави Билал Исени.
Фудбалерите на Башкими се свесни дека пред себе имаат сериозен предизвик.
„Играме против исклучително добро организиран противник, па затоа пред нас е тежок дуел. Сепак, веруваме дека можеме да стигнеме до првите три бода, да ја прекинеме црната серија и да ја израдуваме нашата публика“, додаде Исени.
Во единствениот меѓусебен дуел досега во пријателски меч одигран на 25 јануари минатата година, победата ѝ припадна на екипата на Шкендија со резултат 2-0.
Натпреварот меѓу Башкими и Шкендија Арачиново се игра на стадионот во Куманово со почеток во 16:30 часот, а главен судија ќе биде Стојанче Трпчевски.
