Македонската машка сениорска репрезентација вечерва ќе го одработи првиот тренинг во „Спорт Арена“ во Виена, каде што во недела ја очекува првиот натпревар од втората рунда на претквалификациите за пласман на Евробаскетот 2029.
Пред почетокот на подготовките во австриската престолнина, своите очекувања ги сподели искусниот репрезентативец Стојан Ѓуроски. Тој истакна дека стручниот штаб и играчите веќе направиле анализа на противникот и добро се подготвуваат за она што ги очекува.
Австрија во првиот натпревар од групата претрпе пораз од Кипар, резултат кој беше одредено изненадување. Сепак, според Ѓуроски, тој исход е уште една потврда дека ниту една селекција во групата не смее да биде потценета.
„Го анализиравме натпреварот на Австрија против селекцијата на Кипар, кој го загубија. Искрено, тоа беше изненадувачки пораз, затоа што очекувавме Кипар да биде некој од аутсајдерите во групата. Меѓутоа, покажаа дека се доста добра репрезентација.
Ги видовме предностите, но и недостатоците на Австрија. Имаме два дена тука во Виена, што мислам дека е доволно време добро да се подготвиме за тој натпревар и да стигнеме до првата посакувана победа“, вели Ѓуроски.
Искусното крило на македонската репрезентација смета дека, и покрај промените во ростерот во изминатиот период, националниот тим ќе продолжи да го негува препознатливиот стил на игра воспоставен со доаѓањето на селекторот Хозе Мариа Берокал.
„Откако е тука селекторот Берокал, играме доста слична игра. И самите знаете дека имавме доста промени во ростерот, што поради повреди, што поради клупски обврски, без разлика дали станува збор за Евролигата или Еврокупот.
Меѓутоа, мислам дека нашата игра ќе остане слична. Во овој момент Нено и Мозес се огромно засилување за нас и мислам дека ќе бидеме доста добри“, смета Ѓуроски.
Македонија првиот натпревар од втората рунда на претквалификациите ќе го одигра против Австрија во недела, во „Спорт Арена Виена“, со почеток во 16:05 часот.
