Алкалоид не успеа да ја круниса премиерата пред домашната публика во Регионалната лига со победа. Скопскиот тим вечерва во Автокоманда загуби од Партизан со 31-39, во натпревар во кој гостите го скршија отпорот на домаќинот во второто полувреме.
Првите 30 минути донесоа рамноправна борба. Алкалоид во поголемиот дел од полувремето беше во негатива, но не дозволуваше Партизан да се одлепи. Српскиот состав на пауза замина со само два гола предност, 15-17, оставајќи го натпреварот целосно отворен.
По враќањето на теренот, Партизан постепено ја презеде контролата. Неколку загубени топки и грешки во нападот кај домаќинот му овозможија на противникот да направи посериозна разлика, па во еден момент резултатот беше 25-29.
Алкалоид не се предаде и во неколку наврати успеваше да се доближи на само два или три гола негатива, но немаше доволно концентрација и енергија за целосен камбек. Партизан го искористи тоа и во завршницата дополнително ја зголеми предноста, стигнувајќи до конечни 31-39.
Дополнителен проблем за тимот предводен од Кирил Лазаров беа кадровските отсуства. Алкалоид настапи без пивотите Сухолежник и Карасманакис, како и Велковски и Петковски.
Најефикасен ракометар на натпреварот беше Аљоша Дамјановиќ со десет гола. Кај Алкалоид, Костески реализираше шестпати, додека Цехте постигна пет гола.
За скопскиот состав следува нов предизвик во Регионалната лига, а противник во наредното коло ќе биде црногорскиот шампион Ловќен.
