ЖФК Менада од Тетово продолжува амбициозно да го гради тимот за својата дебитантска сезона во Втората женска фудбалска лига, со јасна цел – веднаш да атакува на историски пласман во Првата лига.
Тетовскиот клуб промовираше две искусни и добро познати имиња во македонскиот женски фудбал – Елена Петровска и Сара Хусеин, кои со своето искуство треба да бидат меѓу главните носители на тимот.
Петровска, позната и по прекарот Ецка, има 28 години и во Менада пристигнува од редовите на Каменица Саса. Во кариерата настапувала и за Љуботен, Скопје, Истатов, Младост Иднина и Единство, клубот од кој ја започнала кариерата.
Зад себе има повеќе од 30 репрезентативни настапи, како и околу десет освоени првенствени и куп-титули. Петровска своевремено беше долгогодишен капитен на ЖФК Скопје и беше меѓу носителите на првите шампионски титули на Љуботен.
Искусната фудбалерка има и повеќе од десет настапи во Лигата на шампионите, а нејзината фудбалска интелигенција и можноста да покрива повеќе позиции ја прават вистински универзалец во составот на Менада.
Втората голема новост е ангажманот на Сара Хусеин. 27-годишната фудбалерка во Тетово пристигнува од Љуботен, а во досегашната кариера настапувала и за Истатов, Каменица Саса, Скопје и Топ Гол, клубот од каде што ги направи првите фудбалски чекори.
Хусеин е дел од генерацијата македонски репрезентативки со 20 и повеќе настапи за националниот тим, а зад себе има и бројни освоени титули во првенството и Купот на Македонија. Позната како креативна и луцидна фудбалерка на позицијата „десетка“, треба да биде важен дел од офанзивната игра на Менада.
Со двете искусни засилувања, тетовскиот клуб добива сериозна доза на квалитет, искуство и победнички менталитет. Петровска и Хусеин треба да бидат меѓу фудбалерките околу кои ќе се гради тимот што ќе се обиде уште во дебитантската сезона да испише историја и да обезбеди место во Првата женска фудбалска лига.
Менада очигледно не сака само да биде учесник во Втората лига – амбициите се многу поголеми, а најавите за нови засилувања дополнително го потврдуваат тоа.
