Кошаркарската федерација на Македонија во Скопје ја одржува задолжителната тренерска клиника, наменета за континуирана едукација и професионално усовршување на тренерите. На првиот од двата работни дена беше реализирана богата програма со предавања од реномирани стручњаци од Македонија и странство, пред околу 200 тренери и гости.
Еден од најпознатите тренери во светската кошарка, Светислав Пешиќ, одржа предавање и практично демонстрираше вежби посветени на дефанзивната транзиција.
Селекторот на македонската сениорска репрезентација, Жозеп Марија Берокал, говореше за офанзивната транзиција, со посебен акцент на принципите и решенијата во играта.
Во попладневниот дел, Саша Грујиќ ги презентираше своите знаења и искуства поврзани со развојот на тимската игра кај младите кошаркари од 10 до 18 години. Посебно внимание беше посветено на играта со додавања и поставувањето блокади, од основните принципи до процесот на донесување одлуки.
Програмата на првиот ден ја затвори Светислав Пешиќ со предавање на тема позициска одбрана.
Учеството на тренерската клиника е бесплатно и задолжително, согласно условите за добивање тренерска лиценца. Од КФМ посочуваат дека целта е овој настан да прерасне во традиционална годишна активност, која ќе придонесува за континуирана едукација на тренерите и понатамошен развој на македонската кошарка.
