Димитријевиќ: Нашата цел е настап на следното ЕП, ќе дадам се од себе за да го оствариме тоа!

Димитријевиќ добро го познава противникот, но смета дека македонскиот тим има доволно време за квалитетна подготовка, усогласување на тактиката и добра тимска работа пред гостувањето во Виена. Повратникот во составот верува дека Македонија може подготвена да го дочека важниот дуел.

„За селекцијата на Австрија знаеме дека е сериозна екипа која игра ‘ран ен ган’ кошарка. Мислам дека е незгоден ривал, но имаме осум до девет дена да се спремиме заедно за мечот и да одиме во Виена на таа посакувана победа“, вели Димитријевиќ.

Во разговорот за составот на Македонија, Димитријевиќ се осврна и на новото решение под кошевите. По повредата на Итан Хап, во националниот тим пристигнува Мозес Рајт, со кого Димитријевиќ очекува добро партнерство.

„Претходно под кошевите Итан Хап го имавме како сериозен и квалитетен играч, но несреќа беше неговата повреда, тоа ни беше хендикеп во претходните квалификации со Естонија. Сега го добиваме Мозес Рајт, преквалитетен играч. Се надевам дека ќе бидеме добар тандем и со останатите играчи ќе дојдеме до успех.“ – вели Димитријевиќ.

Повторното враќање во репрезентативниот дрес за Димитријевиќ има и дополнителна тежина. Целта е Македонија да се избори за настап на следното Европско првенство, а искусниот бек не крие дека сака уште еднаш да биде дел од европскиот шампионат со националниот тим.

„Наша цел е настап на следното Европско првенство, за мене тоа ќе биде последна шанса да играм на еден евро-шампионат со Македонија и ќе дадам сè од себе да го оствариме тоа.“ – заклучи Димитријевиќ.