Женската репрезентација на Македонија до 20 години го заврши настапот на БВА зонските квалификации во Мостар на осмото, последно место, откако забележа пет порази во исто толку натпревари.
Македонските одбојкарки одиграа три средби во групната фаза, а потоа уште два натпревари во разигрувањето за пласман. На петте дуели успеаја да освојат три сета, а иако резултатски не стигнаа до победа, турнирот беше значајно искуство за оваа млада генерација.
Ова беше премиерен настап на селекцијата на Македонија до 20 години во евро-квалификациите. Младите одбојкарки имаа можност да се соочат со репрезентации со поголема традиција и искуство во младинските категории, а во одредени периоди покажаа дека можат да бидат рамноправен противник.
Најголема неизвесност имаше во дуелите со Босна и Херцеговина. Македонија прво загуби со 2:3 во групната фаза, а потоа со 1:3 во разигрувањето за пласман. Двата натпревари донесоа големи пресврти, падови и подеми, а во завршниците одлучуваа нијанси и техничките грешки. Сепак, македонската селекција не успеа да излезе како победник.
Русија е победник на БВА зонските квалификации, откако во финалето ја совлада Белорусија со 3:1. Турција го освои третото место со убедливата победа од 3:0 над Романија, додека Бугарија во дуелот за петтата позиција славеше против Србија со 3:2.
БВА ЗОНСКИ КВАЛИФИКАЦИИ У20 Ж
ГРУПНА ФАЗА:
РОМАНИЈА – МАКЕДОНИЈА 3:0 (25:17, 25:20, 25:16)
МАКЕДОНИЈА – БЕЛОРУСИЈА 0:3 (19:25, 19:25, 18:25)
БИХ – МАКЕДОНИЈА 3:2 (24:26, 22:25, 25:21, 25:18, 15:11)
РАЗИГРУВАЊЕ ЗА ПЛАСМАН 5-8. МЕСТО:
СРБИЈА – МАКЕДОНИЈА 3:0 (25:13, 25:14, 25:16)
МЕЧ ЗА 7. МЕСТО:
МАКЕДОНИЈА – БИХ 1:3 (14:25, 25:23, 22:25, 14:25)
