Филип Кузмановски имаше блескава вечер во „Боро Чурлевски“ и со 15 погодоци беше најзаслужен за победничкиот старт на Еурофарм Пелистер во Регионалната лига. Битолчани пред својата публика го совладаа српскиот шампион Партизан со 35-31.
Уште во првите 30 минути домаќинот наметна ритам кој гостите тешко го следеа. Еурофарм Пелистер на паузата замина со седум гола предност (20-13), а во продолжението разликата во еден момент достигна и девет погодоци.
Капитенот Кузмановски, покрај голгетерскиот учинок, запиша и девет асистенции и беше клучната фигура во нападот на битолскиот состав. По четири пати во листата на стрелците се запишаа Никола Граховац и Ник Хенигман.
Партизан во своите редови го имаше расположениот Тобијас Вагнер, кој со десет гола беше најпрецизен кај српскиот состав, но неговиот учинок не беше доволен за гостите да се вратат во натпреварот. Раул Гонзалес во Битола настапи без Кулеш и Кос, додека Еурофарм Пелистер не ги вклучи новите засилувања во составот за оваа пресметка. Червар се потпре на играчите кои го носеа најголемиот товар во минатата сезона.
Со контролата на резултатот во текот на целиот втор дел, домашниот тим рутински ја приведе средбата до крај и запиша убедлива победа пред полните трибини.
Битолчани немаат многу време за одмор, бидејќи веќе на 26 август ги очекува нов натпревар во Регионалната лига, повторно на домашен терен, против Ловќен Цетиње. Пет дена подоцна, на 31 август, Еурофарм Пелистер ќе се соочи и со Дубочица Лесковац.
