Второлигашот Камјани продолжува со создавање конкурентен состав за својата историска прва сезона во Втората македонска фудбалска лига, а најново засилување е Герт Арифи.
Арифи е офанзивен фудбалер кој најдобро се снаоѓа на крилните позиции и може подеднакво успешно да игра на двете страни. Се одликува со голема брзина, одлична техника, креирање шанси и способност да биде конкретен во завршницата.
Новиот фудбалер на Камјани својата кариера ја градел во академијата на Шкендија, каде ги поминал сите младински категории до У17. Во текот на престојот во тетовскиот клуб Арифи бил капитен, најдобар стрелец и најдобар асистент, со што го потврдил својот талент и лидерски карактер.
Добрите настапи му донеле промоција во првиот тим на Шкендија, по што следувал трансфер во Фероникели 74, клуб кој се натпреварува во Суперлигата на Косово. Таму Арифи стекнал дополнително искуство во исклучително конкурентна средина.
Иако ова лето имал сериозен интерес и понуди од клубови како 2 Корик и Лапи, Арифи одлучил да се врати во родниот крај и да го облече дресот на Камјани.
Со неговиот ангажман Камјани добива уште еден квалитетен офанзивец во пресрет на историската сезона. Клубот, кој за првпат ќе се натпреварува во Втората лига, амбициозно го гради тимот за дебитантската сезона во ВМФЛ.
Камјани новата сезона ќе ја започне со тешко гостување во Битола, каде во првото коло ќе му гостува на Пелистер.
