Кошаркарскиот суперлигаш и актуелен вицешампион на Македонија, КК Маџари, започнува ново поглавје во своето функционирање. Клубот официјално го назначи Боро Атанасовски за нов претседател, откако Управниот одбор му ја довери оваа значајна функција.
Атанасовски е успешен стопанственик и поранешен фудбалер на ФК Маџари, а со години активно го поддржува развојот на спортот и спортските колективи. Во клубот веруваат дека неговото искуство, визија и посветеност ќе придонесат за понатамошниот напредок на Маџари.
Од КК Маџари истакнуваат дека особено ги радува фактот што Атанасовски го препознал потенцијалот на клубот и ја прифатил одговорноста да биде дел од неговата иднина во период исполнет со нови предизвици и високи цели.
Пред новиот претседател ќе стои задачата да го предводи клубот во новата сезона, во која Маџари повторно ќе се натпреварува во Супер лигата на Македонија, а паралелно ќе има настапи и на меѓународната сцена во АБА2 лигата.
Од таборот на вицешампионот изразија уверување дека со новото раководство ќе продолжат да испишуваат успешни страници во клупската историја и да остваруваат значајни резултати, како во домашните, така и во регионалните натпреварувања.
