Спортска Мрежа повторно беше во право. Трансферот на Валентин Кочоски во редовите на второлигашот Охрид, кој ексклузивно го најавивме пред неколку дена, денеска доби и официјална потврда од клубот.
Охрид продолжува да гради сериозен и конкурентен ростер со кој ќе атакува на пласман во Првата македонска фудбалска лига, а 29-годишниот Валентин Кочоски претставува уште едно големо засилување за составот предводен од Ромео Кочоски.
Офанзивниот играч за врска пристигнува од редовите на Струга Трим Лум, а зад себе има богата прволигашка кариера со повеќе од 180 настапи во Првата македонска фудбалска лига. Во текот на својата кариера ги бранеше боите на Академија Пандев, Шкупи, Струга Трим Лум, Пелистер, Воска Спорт и Силекс, а беше дел и од шампионската генерација на Струга Трим Лум. Покрај големото искуство, Кочоски зад себе има и значителен број голови и асистенции, а е и поранешен младински репрезентативец на Македонија.
Од клубот со официјална објава му посакаа добредојде на новото засилување.
„ДОБРЕДОЈДЕ ДОМА, ВАЛЕНТИН! ГФК Охрид Лихнидос со големо задоволство го претставува своето ново засилување – Валентин Кочоски. 29-годишниот офанзивен играч за врска зад себе има богато искуство на македонската прволигашка сцена, со над 180 настапи во Првата македонска фудбалска лига, настапувајќи за екипите на Академија Пандев, Шкупи, Струга Трим Лум, Пелистер, Воска Спорт и Силекс. Во својата кариера има постигнато и значителен број голови и асистенции, а беше дел и од шампионската генерација на Струга Трим Лум. Кочоски е поранешен младински репрезентативец на Македонија и фудбалер кој со своето искуство, квалитет и професионален однос ќе претставува големо засилување за нашиот тим во новата сезона. Му посакуваме многу здравје, успешни настапи и заедно да оствариме многу победи и радости во сино-белиот дрес. Добредојде во ГФК Охрид Лихнидос, Валентин!“
Како што претходно објави Спортска Мрежа, Охрид ова лето сериозно се засилува со јасна цел – враќање во Првата македонска фудбалска лига. Поради новиот систем на натпреварување, првите две екипи директно ќе обезбедат пласман во елитата, додека третопласираниот тим ќе игра бараж, што дополнително ги зголемува амбициите на „рибарите“.
Екипата моментално се наоѓа во карантин во хотел „Десарет“ во Пештани, подготовките ги реализира на СРЦ „Билјанини Извори“, а во наредниот период ќе одигра и неколку контролни натпревари пред стартот на сезоната.
Новата сезона во Втората македонска фудбалска лига започнува на 15 август, а Охрид во првото коло на домашен терен ќе го пречека составот на Новаци.
