Македонскиот шампион Вардар со победа се прости од квалификациите за Лигата на шампионите, откако во реваншот славеше со 2:3 против финскиот КуПС, но тоа не беше доволно за пласман понатаму. По поразот од 0:2 во Скопје, „црвено-црните“ успеаја да ја надополнат негативата во регуларниот дел, но по драматичните продолженија финскиот првак со вкупни 4:3 обезбеди место во следната рунда.
Избраниците на Кристијан Фабијани од самиот старт покажаа дека немаат намера лесно да се откажат. Вардар беше поофанзивен, ја контролираше играта и првата голема можност ја имаше преку Бобан Николов, чиј удар заврши покрај голот. Финците возвратија пред паузата преку Армах, но Талески остана несовладан и на одмор се замина без голови.
Во продолжението Вардар продолжи да напаѓа, а наградата стигна во 59. минута. По центаршутот на Николов и дуелот со Азер Омерагиќ, домашната одбрана лошо реагираше, а топката заврши во сопствената мрежа за водство на македонскиот шампион од 0:1.
„Црвено-црните“ не застанаа тука. Во самиот финиш Герсон Родригеш беше соборен во шеснаесетникот, а по ВАР-проверката судијата покажа на белата точка. Горан Закариќ беше сигурен реализатор за 0:2, резултат со кој Вардар ја анулираше негативата од првиот натпревар и избори продолженија.
Дополнителните 30 минути донесоа вистинска фудбалска драма. КуПС прв зададе удар преку Армах, кој во 100. минута намали на 1:2. Само две минути подоцна следеше експресен одговор на Вардар, кога Пулејо ја затресе мрежата за 1:3 и повторно ги врати надежите за сензационален пресврт.
Сепак, радоста траеше кратко. Во 105. минута домаќинот доби пенал, кој Пјотр Паржижек го претвори во гол за 2:3. До крајот Вардар вложи максимални напори да постигне уште еден погодок кој ќе го одведеше понатаму, но финската екипа успеа да ја сочува предноста во вкупниот резултат и да избори пласман во второто квалификациско коло.
И покрај елиминацијата, Вардар остави далеку подобар впечаток отколку на првиот натпревар и покажа дека можел рамноправно да се носи со финскиот шампион. Европската приказна за македонскиот првак, сепак, не завршува тука. Вардар ќе го продолжи настапот во квалификациите за Конференциската лига на УЕФА, каде за противник ќе го има поразениот од двомечот меѓу Рига од Летонија и Арарат од Ерменија.
