Фудбалскиот тренер и поранешен фудбалер Александар Максимов ја промовираше својата авторска книга „Играта Зад Играта (The Game Behind The Game)“, проект кој претставува ментален framework посветен на психолошката и професионалната страна на современиот фудбал.
Станува збор за дело кое е насочено кон реалните барања на елитното ниво, а во кое посебен акцент е ставен на менталитетот, дисциплината, притисокот, лидерството, идентитетот и секојдневните стандарди во модерниот фудбал.
Книгата не е замислена како класична мотивациска литература, туку како практичен и реален приказ за тоа што навистина е потребно за напредок, конзистентност и професионален развој на еден фудбалер.
PDF верзијата веќе е достапна, додека во наредниот период се очекува и hardcover издание кое ќе биде наменето за фудбалери, тренери, академии, родители и сите што се дел од развојниот процес во спортот.
Во изјава за Спортска Мрежа, Максимов детално говореше за идејата и процесот зад создавањето на книгата.
„Проектот е создаден како резултат на долгогодишно искуство низ различни фудбалски средини, култури и системи на работа — преку играње во Австрија, Србија, Црна Гора, Босна и Херцеговина, Италија и Македонија, како и тренерска работа во Грција.
Покрај практичното искуство од теренот, големо влијание во создавањето на овој проект имаа и бројни разговори, анализи и учење од луѓе кои работат и функционираат на високо професионално ниво — во фудбалот, психологијата, лидерството и личниот развој.“
Максимов потенцира дека токму тие искуства помогнале да се создаде поширока слика за развојот на еден модерен фудбалер, не само од технички и тактички аспект, туку и од човечки и ментален агол.
„Сите тие искуства помогнаа да се изгради поширока перспектива за тоа што навистина значи развој на еден модерен фудбалер — не само технички и тактички, туку и ментално, професионално и човечки.
Од таа визија произлезе и авторската книга „Играта зад Играта“ — ментална рамка (mental framework) за фудбалери и тренери, базирана на реални искуства, приказни, принципи, психологија и начинот на размислување што стои зад професионалниот фудбал.“
Тренерот смета дека најголемата вредност на книгата е тоа што на младите им ја прикажува реалната страна на патот кон успехот, далеку од рефлекторите и краткорочната мотивација.
„Целта на книгата е да им помогне на младите играчи, тренери и амбициозни луѓе да добијат пореална слика за патот кон успехот и да разберат дека најважните работи често се случуваат далеку од рефлекторите — во дисциплината, карактерот, секојдневните навики и менталитетот.
Книгата моментално е достапна на македонски и англиски јазик во PDF формат, додека професионален превод на српски јазик е во подготовка. Печатеното издание се очекува во јуни.“
Со ова дело, Александар Максимов носи поинаков и подлабок пристап кон фудбалот, отворајќи теми кои сè почесто се сметаат за клучни во развојот на модерните спортисти и професионалци.
