ГРК Охрид се пласираше во финалето на ЕХФ Европскиот Куп, а поддршката продолжува да пристигнува од сите страни – меѓу кои и од актуелниот освојувач на трофејот, РК Алкалоид.
Клубот од Автокоманда, кој минатата сезона го освои ЕХФ Европскиот Куп, се приклучи на честитките за „гладијаторите“, потенцирајќи ја вредноста на овој успех за целиот македонски ракомет.
,,РК Алкалоид упатува честитки до ГРК Охрид за пласманот во финалето на Европскиот Куп на ЕХФ! Трофејот и оваа година нека биде за клуб од Македонија!”- порачаа од РК Алкалоид.
Со пласманот на Охрид во финалето, Македонија повторно има свој претставник во завршницата на ова натпреварување – континуитет што говори за квалитетот и напредокот на домашната сцена. Минатата сезона Алкалоид го донесе европскиот трофеј, а сега Охрид има шанса да ја продолжи таа успешна приказна.
Охриѓани до финалето стигнаа по драматична полуфинална пресметка против Целје, каде по две израмнети средби, патникот беше решен преку пенали. Во финалето, македонскиот претставник ќе се соочи со унгарскиот тим Татабања.
Овој успех не е важен само за Охрид, туку и за целиот македонски ракомет – како потврда дека клубовите од нашата земја можат континуирано да бидат конкурентни на европско ниво и да создаваат резултати што обединуваат.
