Македонскиот автомобилизам повторно има причина за гордост, откако најдобриот и најтрофеен возач Игор Стефановски – Иџе оствари голем успех на меѓународна сцена. Тој триумфираше на престижната ридска трка во Котор, која важи за една од најатрактивните и најконкурентни во регионот.
Во силна конкуренција од дури 134 возачи, Стефановски успеа да се искачи на највисокото место на подиумот, уште еднаш потврдувајќи ја својата врвна класа и искуство. Тој до победата стигна со вкупно време од 4:20,64, односно 2:10,86 во првата и 2:09,78 во втората трка. Со овој резултат, Иџе беше за 13 секунди побрз од второпласираниот натпреварувач.
Овој успех има дополнителна тежина, имајќи предвид дека трката во Котор носи бодови за повеќе шампионати – шампионатот на Црна Гора, првенството на Хрватска, како и за Котор куповите. Настанот беше организиран од Автомобилскиот и картинг сојуз на Црна Гора во соработка со АМСК Котор.
Со оваа победа, Игор Стефановски – Иџе уште еднаш го потврди својот статус како еден од најдоминантните автомобилисти во регионот и горд амбасадор на македонскиот спорт.
