Охрид се подготвува за еден од најважните натпревари во сезоната – реваншот од полуфиналето во ЕХФ Европскиот Куп против екипата на Целје.
Интересот за натпреварот е огромен, а тоа го потврдува и фактот што билетите се распродадоа неколку дена однапред. СРЦ „Билјанини Извори“ ќе биде исполнета до последното место, со повеќе од 3.000 навивачи кои ќе создадат атмосфера достојна за европски спектакл и ќе бидат силна поддршка за домашниот тим.
Првиот дуел во Словенија заврши со минимална победа на Целје од 27-26, што остава сè отворено пред реваншот. Охрид ќе има шанса пред своја публика да ја анулира негативата и да се избори за историски пласман во финалето.
Натпреварот е закажан за 2 мај со почеток од 18:00 часот, а салата веќе е распродадена – доказ дека градот живее за овој натпревар.
